Ang Nasirang Imahe

“Ang Nasirang Imahe”

Sanaysay ni: Karl Andrei Santisteban | 10 - Honesty

            Madalas nating naririnig sa mga balita ang madalas na patayan sa ating bansa. Yung mga patayan na hindi nakikilala ang mga pumapatay o yung mga pulis ang sangkot sa mga patayan na wala namang search warrant o arrest warrant; at yung mga biktimang wala naman talagang ginagawang masama. Extrajudicial Killings ang tawag dito, ngunit paano ng aba nasisira ang imahe ng Pilipinas sa buong mundo ng dahil dito?

            Isa tayo sa mga founding members ng United Nations matapos ang Ikalawang Digmaang Pandaigdig at inaasahang respetuhin ang karapatang pantao ng mga mamamayan ng ating bansa. Pero ngayon, mismong mga pulis na mismo ang kumikitil sa buhay ng ilan nating mga kababayan. Kapag napuna naman ng mga lider ng iba’t-ibang bansa, mumurahin pa ng ating pangulo at ipagtatanggol ang mga pulis na sangkot dito; nawawalan narin ng silbi ang mga pulis na nagiimbestiga kasi hindi na rin sila pagkakatiwalaan ng taong bayan. May mga (Standard Operating Procedures) S.O.P. ang mga pulis na dapat sundin, katulad ng pagpapaputok ng baril kung sakaling manlaban ang suspek, at hindi sila pwedeng umaresto nang walang search warrant o warrant of arrest. Pag ang isa rito ay malabag, maaaring maging kontrobersyal ang operasyon at mas lalong lumaki ang isyu na ikasisira ng imahe ng ating bansa. Kabilang na rito sina Kian Delos Santos, Carl Arnaiz at si Reynaldo de Guzman -- na kasama ni Carl Arnaiz -- na pinatay ng mga pulis nang walang ebidensya.

            Tayong mga mamamayan ay pinakikinggan ng gobyerno. Huwag tayong maging pipi, kung alam natin na ang karapatan ng tao ay nawawala na, sabihin natin sa pamahalaan na mali na ang ginagawa nila. Huwag natin sayangin ang demokrasyang ibinigay sa atin, kaya’t umpisahan na nating gabayan ang ating gobyerno. Ikaw kasama ka ba sa pagbabagong inaasam?